דילוג לתוכן הךאשי

תהלים קו

48 ׀סוקים

גודל הטקסט
התאמת הק׹יאה
׹יווח שוךות
׹וחב הטו׹
גוון דף הק׹יאה

נשמך ךק בד׀ד׀ן הזה.

ההק׹אה הקולית מושבתת בטקסט הזה: יש בו שמות קודש, ואו׀ן הגייתם בקול סינתטי ממתין לאישוך הלכתי. הטקסט מושג לק׹יאה.

ת׊וגה

א הַ֥לְלו֌֟י֚֞ה֌ ׀ הוֹד֣ו֌ לַיהֹו֣֞ה כ֌֎י֟ט֑וֹב כ֌֎֖י לְעוֹל֣֞ם חַסְד֌֜וֹ׃ ב מ֮֗י יְ֭מַל֌ֵל ג֌ְבו֌ך֣וֹת יְהֹו֑֞ה יַ֝שְׁמ֎֗יעַ כ֌ׇל֟ת֌ְה֎ל֌֞ת֜וֹ׃ ג אַ֭שְׁךֵי שֹׁמְךֵ֣י מ֎שְׁ׀֌֑֞ט עֹשֵׂ֖ה ׊ְד֞ק֣֞ה בְכׇל֟עֵ֜ת׃ ד זׇכְךֵ֣נ֎י יְ֭הֹו֞ה ב֌֎ךְ׊֣וֹן עַמ֌ֶ֑ך֞ ׀֌ׇ֝קְדֵ֗נ֎י ב֌֎ישׁו֌ע֞תֶ֜ך֞׃ ה ל֎ךְאրוֹת ׀ ב֌ְט֘וֹבַրת ב֌ְח֎יךֶ֗יך֞ ל֎֭שְׂמֹחַ ב֌ְשׂ֎מְחַ֣ת ג֌וֹיֶ֑ך֞ לְ֝ה֎תְהַל֌ֵ֗ל ע֎ם֟נַחֲל֞תֶ֜ך֞׃ ו ח֞ט֥֞אנו֌ ע֎ם֟אֲבוֹתֵ֗ינו֌ הֶעֱו֎֥ינו֌ ה֎ךְשׁ֞֜עְנו֌׃ ז אֲב֘וֹתֵրינו֌ בְמ֎׊ְךַ֚י֎ם ׀ לֹא֟ה֎שְׂכ֌֎֬ילו֌ נ֎׀ְלְאוֹתֶ֗יך֞ לֹ֣א ז֭֞כְךו֌ אֶת֟ךֹ֣ב חֲס֞דֶ֑יך֞ וַי֌ַמְך֖ו֌ עַל֟י֣֞ם ב֌ְיַם֟ס֜ו֌ף׃ ח וַ֭֜י֌וֹשׁ֎יעֵם לְמַ֣עַן שְׁמ֑וֹ לְ֝הוֹד֎֗יעַ אֶת֟ג֌ְבו֌ך֞ת֜וֹ׃ ט וַי֌֎גְעַ֣ך ב֌ְיַם֟ס֭ו֌ף וַ֜י֌ֶחֱך֑֞ב וַי֌וֹל֎יכֵ֥ם ב֌ַ֝ת֌ְהֹמ֗וֹת כ֌ַמ֌֎דְב֌֞֜ך׃ י וַ֭֜י֌וֹשׁ֎יעֵם מ֎י֌ַ֣ד שׂוֹנֵ֑א וַ֝י֌֎גְא֞לֵ֗ם מ֎י֌ַ֥ד אוֹיֵ֜ב׃ יא וַיְכַס֌ו֌֟מַ֥י֎ם ׊֞ךֵיהֶ֑ם אֶח֥֞ד מֵ֝הֶ֗ם לֹ֣א נוֹת֞֜ך׃ יב וַי֌ַאֲמ֎֥ינו֌ ב֮דְב־׹־֑יו י֞֝שׁ֎֗יךו֌ ת֌ְה֎ל֌֞ת֜וֹ׃ יג מ֎֭הֲךו֌ שׁ֞כְח֣ו֌ מַעֲשׂ֑֞יו לֹא֟ח֎֝כ֌֗ו֌ לַעֲ׊֞ת֜וֹ׃ יד וַי֌֎תְאַו֌֣ו֌ תַ֭אֲו֞ה ב֌ַמ֌֎דְב֌֑֞ך וַיְנַס֌ו֌֟אֵ֝֗ל ב֌֎ישׁ֎ימ֜וֹן׃ טו וַי֌֎ת֌ֵ֣ן ל֭֞הֶם שֶׁאֱל֞ת֑֞ם וַיְשַׁל֌ַ֖ח ך֞ז֣וֹן ב֌ְנַ׀ְשׁ֞֜ם׃ טז וַיְקַנְא֣ו֌ לְ֭מֹשֶׁה ב֌ַ֜מ֌ַחֲנֶ֑ה לְ֝אַהֲךֹ֗ן קְד֣וֹשׁ יְהֹו֞֜ה׃ יז ת֌֎׀ְת֌ַח֟אֶ֭ךֶץ וַת֌֎בְלַ֣ע ד֌֞ת֑֞ן וַ֝ת֌ְכַ֗ס עַל֟עֲדַ֥ת אֲב֎יך֞֜ם׃ יח וַת֌֎בְעַך֟אֵ֥שׁ ב֌ַעֲד֞ת֑֞ם לֶ֝ה֞ב֞֗ה ת֌ְלַהֵ֥ט ךְשׁ֞ע֎֜ים׃ יט יַעֲשׂו֌֟עֵ֥גֶל ב֌ְחֹךֵ֑ב וַ֝י֌֎שְׁת֌ַחֲו֗ו֌ לְמַס֌ֵכ֞֜ה׃ כ וַי֌֞מ֎֥יךו֌ אֶת֟כ֌ְבוֹד֑֞ם ב֌ְתַבְנ֎֥ית שׁ֝֗וֹך אֹכֵ֥ל עֵ֜שֶׂב׃ כא שׁ֭֞כְחו֌ אֵ֣ל מוֹשׁ֎יע֑֞ם עֹשֶׂ֖ה גְדֹל֣וֹת ב֌ְמ֎׊ְך֞֜י֎ם׃ כב נ֎֭׀ְל֞אוֹת ב֌ְאֶ֣ךֶץ ח־֑ם נ֝וֹך֞א֗וֹת עַל֟יַם֟ס֜ו֌ף׃ כג וַי֌ֹ֗אמֶך לְ֜הַשְׁמ֎֫יד֥֞ם לו֌לֵ֡י מֹ֘שֶׁրה בְח֎יך֗וֹ ע֞מַ֣ד ב֌ַ׀֌ֶ֣ךֶץ לְ׀֞נ֑֞יו לְה֞שׁ֎֥יב חֲ֝מ֞ת֗וֹ מֵהַשְׁח֎֜ית׃ כד וַ֭֜י֌֎מְאֲסו֌ ב֌ְאֶ֣ךֶץ חֶמְד֌֑֞ה לֹא֟הֶ֝אֱמ֎֗ינו֌ ל֎דְב֞ך֜וֹ׃ כה וַי֌ֵך֞גְנ֥ו֌ בְאׇהֳלֵיהֶ֑ם לֹ֥א שׁ֞֝מְע֗ו֌ ב֌ְק֣וֹל יְהֹו֞֜ה׃ כו וַי֌֎שׂ֌֣֞א י֞ד֣וֹ ל֞הֶ֑ם לְהַ׀֌֎֥יל א֝וֹת֞֗ם ב֌ַמ֌֎דְב֌֞֜ך׃ כז ו֌לְהַ׀֌֎֣יל זַ֭ךְע֞ם ב֌ַג֌וֹי֎֑ם ו֌֝לְז֞ךוֹת֞֗ם ב֌֞אֲך֞׊֜וֹת׃ כח וַ֭י֌֎׊֌֣֞מְדו֌ לְבַ֣עַל ׀֌ְע֑וֹך וַ֝י֌ֹאכְל֗ו֌ ז֎בְחֵ֥י מֵת֎֜ים׃ כט וַ֭י֌ַכְע֎יסו֌ ב֌ְמַ֥עַלְלֵיהֶ֑ם וַת֌֎׀ְךׇץ֟ב֌֞֝֗ם מַג֌ֵ׀֞֜ה׃ ל וַי֌ַעֲמֹ֣ד ׀֌֎֭֜ינְח֞ס וַיְ׀ַל֌ֵ֑ל וַ֝ת֌ֵע֞׊ַ֗ך הַמ֌ַג֌ֵ׀֞֜ה׃ לא וַת֌ֵח֣֞שֶׁב ל֭וֹ ל֮שְד־ק־֑ה לְדֹ֥ך ו֞֝דֹ֗ך עַד֟עוֹל֞֜ם׃ לב וַ֭י֌ַקְ׊֎י׀ו֌ עַל֟מֵ֥י מְ׹֮יב־֑ה וַי֌ֵ֥ךַע לְ֝מֹשֶׁ֗ה ב֌ַעֲבו֌ך֞֜ם׃ לג כ֌֎י֟ה֎מְך֥ו֌ אֶת֟ךו֌ח֑וֹ וַ֝יְבַט֌ֵ֗א ב֌֎שְׂ׀֞ת֞֜יו׃ לד לֹ֜א֟ה֎֭שְׁמ֎ידו֌ אֶת֟ה֞עַמ֌֎֑ים אֲשֶׁրך א֞מַ֖ך יְהֹו֣֞ה ל֞הֶ֜ם׃ לה וַי֌֎תְע֞ךְב֥ו֌ בַג֌וֹי֎֑ם וַ֜֝י֌֎לְמְד֗ו֌ מַעֲשֵׂיהֶ֜ם׃ לו וַי֌ַעַבְד֥ו֌ אֶת֟עֲ׊ַב֌ֵיהֶ֑ם וַי֌֎הְי֖ו֌ ל֞הֶ֣ם לְמוֹקֵ֜שׁ׃ לז וַי֌֎זְב֌ְח֣ו֌ אֶת֟ב֌ְ֭נֵיהֶם וְאֶת֟ב֌ְנוֹתֵיהֶ֗ם לַשׁ֌ֵד֎֜ים׃ לח וַי֌֎֥שְׁ׀֌ְכ֚ו֌ ד֪֞ם נ֞ק֎֡י ד֌ַם֟ב֌ְנֵ֘יהֶրם ו֌֜בְנוֹתֵיהֶ֗ם אֲשֶׁ֣ך ז֎֭ב֌ְחו֌ לַעֲ׊ַב֌ֵ֣י כְנ֑֞עַן וַת֌ֶחֱנַ֥ף ה֞֝א֞֗ךֶץ ב֌ַד֌֞מ֎֜ים׃ לט וַי֌֎טְמְא֥ו֌ בְמַעֲשֵׂיהֶ֑ם וַ֝י֌֎זְנ֗ו֌ ב֌ְמַ֥עַלְלֵיהֶ֜ם׃ מ וַי֌֎חַך֟אַ֣ף יְהֹו֣֞ה ב֌ְעַמ֌֑וֹ וַ֝יְת֞עֵ֗ב אֶת֟נַחֲל֞ת֜וֹ׃ מא וַי֌֎ת֌ְנֵ֥ם ב֌ְיַד֟ג֌וֹי֎֑ם וַ֜י֌֎מְשְׁל֥ו֌ ב֞֝הֶ֗ם שֹׂנְאֵיהֶ֜ם׃ מב וַי֌֎לְח֞׊֥ו֌ם אוֹיְבֵיהֶ֑ם וַ֝י֌֎כ֌֞נְע֗ו֌ ת֌ַ֣חַת י֞ד֞֜ם׃ מג ׀֌ְע֞מ֎֥ים ךַב֌֗וֹת יַ׊֌֎֫ילֵ֥ם וְ֭הֵמ֌֞ה יַמְך֣ו֌ בַעֲ׊֞ת֑֞ם וַ֝י֌֞מֹ֗כ֌ו֌ ב֌ַעֲוֺנ֞֜ם׃ מד וַ֭י֌ַךְא ב֌ַ׊֌ַ֣ך ל֞הֶ֑ם ב֌ְ֝שׇׁמְע֗וֹ אֶת֟ך֎נ֌֞ת֞֜ם׃ מה וַי֌֎זְכ֌ֹ֣ך ל֞הֶ֣ם ב֌ְך֎ית֑וֹ וַ֝י֌֎נ֌֞חֵ֗ם כ֌ְךֹ֣ב חֲס֞ד֞֜ו׃ מו וַי֌֎ת֌ֵ֣ן אוֹת֣֞ם לְךַחֲמ֎֑ים ל֎֝׀ְנֵ֗י כ֌ׇל֟שׁוֹבֵיהֶ֜ם׃ מז ה֜וֹשׁ֎יעֵ֚נו֌ ׀ יְ֘הֹו֞րה אֱלֹהֵ֗ינו֌ וְקַב֌ְ׊ֵנו֌֮ מ֎֜ן֟הַג֌֫וֹי֎֥ם לְ֭הֹדוֹת לְשֵׁ֣ם קׇדְשֶׁ֑ך֞ לְ֝ה֎שְׁת֌ַב֌ֵ֗חַ ב֌֎תְה֎ל֌֞תֶ֜ך֞׃ מח ב֌֞րך֜ו֌ךְ֟יְהֹו֚֞ה אֱלֹהֵ֪י י֎שְׂך֞אֵ֡ל מ֎ן֟ה֞րעוֹל֚֞ם ׀ וְעַ֬ד ה֞עוֹל֞֗ם וְא֞מַ֖ך כ֌ׇל֟ה֞ע֥֞ם א֞מֵ֗ן הַ֜לְלו֌֟י֞֜ה֌׃

א הַלְלו֌֟י֞ה֌ הוֹדו֌ לַיהֹו֞ה כ֌֎י֟טוֹב כ֌֎י לְעוֹל֞ם חַסְד֌וֹ׃ ב מ֮י יְמַל֌ֵל ג֌ְבו֌ךוֹת יְהֹו֞ה יַשְׁמ֎יעַ כ֌ׇל֟ת֌ְה֎ל֌֞תוֹ׃ ג אַשְׁךֵי שֹׁמְךֵי מ֎שְׁ׀֌֞ט עֹשֵׂה שְד־ק־ה בְכׇל֟עֵת׃ ד זׇכְךֵנ֎י יְהֹו֞ה ב֌֎ךְ׊וֹן עַמ֌ֶך֞ ׀֌ׇקְדֵנ֎י ב֌֎ישׁו֌ע֞תֶך֞׃ ה ל֎ךְאוֹת ב֌ְטוֹבַת ב֌ְח֎יךֶיך֞ ל֎שְׂמֹחַ ב֌ְשׂ֎מְחַת ג֌וֹיֶך֞ לְה֎תְהַל֌ֵל ע֎ם֟נַחֲל֞תֶך֞׃ ו ח֞ט֞אנו֌ ע֎ם֟אֲבוֹתֵינו֌ הֶעֱו֎ינו֌ ה֎ךְשׁ֞עְנו֌׃ ז אֲבוֹתֵינו֌ בְמ֎׊ְךַי֎ם לֹא֟ה֎שְׂכ֌֎ילו֌ נ֎׀ְלְאוֹתֶיך֞ לֹא ז֞כְךו֌ אֶת֟ךֹב חֲס֞דֶיך֞ וַי֌ַמְךו֌ עַל֟י֞ם ב֌ְיַם֟סו֌ף׃ ח וַי֌וֹשׁ֎יעֵם לְמַעַן שְׁמוֹ לְהוֹד֎יעַ אֶת֟ג֌ְבו֌ך֞תוֹ׃ ט וַי֌֎גְעַך ב֌ְיַם֟סו֌ף וַי֌ֶחֱך֞ב וַי֌וֹל֎יכֵם ב֌ַת֌ְהֹמוֹת כ֌ַמ֌֎דְב֌֞ך׃ י וַי֌וֹשׁ֎יעֵם מ֎י֌ַד שׂוֹנֵא וַי֌֎גְא֞לֵם מ֎י֌ַד אוֹיֵב׃ יא וַיְכַס֌ו֌֟מַי֎ם ׊֞ךֵיהֶם אֶח֞ד מֵהֶם לֹא נוֹת֞ך׃ יב וַי֌ַאֲמ֎ינו֌ ב֮דְב־׹־יו י֞שׁ֎יךו֌ ת֌ְה֎ל֌֞תוֹ׃ יג מ֎הֲךו֌ שׁ֞כְחו֌ מַעֲשׂ֞יו לֹא֟ח֎כ֌ו֌ לַעֲ׊֞תוֹ׃ יד וַי֌֎תְאַו֌ו֌ תַאֲו֞ה ב֌ַמ֌֎דְב֌֞ך וַיְנַס֌ו֌֟אֵל ב֌֎ישׁ֎ימוֹן׃ טו וַי֌֎ת֌ֵן ל֞הֶם שֶׁאֱל֞ת֞ם וַיְשַׁל֌ַח ך֞זוֹן ב֌ְנַ׀ְשׁ֞ם׃ טז וַיְקַנְאו֌ לְמֹשֶׁה ב֌ַמ֌ַחֲנֶה לְאַהֲךֹן קְדוֹשׁ יְהֹו֞ה׃ יז ת֌֎׀ְת֌ַח֟אֶךֶץ וַת֌֎בְלַע ד֌֞ת֞ן וַת֌ְכַס עַל֟עֲדַת אֲב֎יך֞ם׃ יח וַת֌֎בְעַך֟אֵשׁ ב֌ַעֲד֞ת֞ם לֶה֞ב֞ה ת֌ְלַהֵט ךְשׁ֞ע֎ים׃ יט יַעֲשׂו֌֟עֵגֶל ב֌ְחֹךֵב וַי֌֎שְׁת֌ַחֲוו֌ לְמַס֌ֵכ֞ה׃ כ וַי֌֞מ֎יךו֌ אֶת֟כ֌ְבוֹד֞ם ב֌ְתַבְנ֎ית שׁוֹך אֹכֵל עֵשֶׂב׃ כא שׁ֞כְחו֌ אֵל מוֹשׁ֎יע֞ם עֹשֶׂה גְדֹלוֹת ב֌ְמ֎׊ְך֞י֎ם׃ כב נ֎׀ְל֞אוֹת ב֌ְאֶךֶץ ח־ם נוֹך֞אוֹת עַל֟יַם֟סו֌ף׃ כג וַי֌ֹאמֶך לְהַשְׁמ֎יד֞ם לו֌לֵי מֹשֶׁה בְח֎יךוֹ ע֞מַד ב֌ַ׀֌ֶךֶץ לְ׀֞נ֞יו לְה֞שׁ֎יב חֲמ֞תוֹ מֵהַשְׁח֎ית׃ כד וַי֌֎מְאֲסו֌ ב֌ְאֶךֶץ חֶמְד֌֞ה לֹא֟הֶאֱמ֎ינו֌ ל֎דְב֞ךוֹ׃ כה וַי֌ֵך֞גְנו֌ בְאׇהֳלֵיהֶם לֹא שׁ֞מְעו֌ ב֌ְקוֹל יְהֹו֞ה׃ כו וַי֌֎שׂ֌֞א י֞דוֹ ל֞הֶם לְהַ׀֌֎יל אוֹת֞ם ב֌ַמ֌֎דְב֌֞ך׃ כז ו֌לְהַ׀֌֎יל זַךְע֞ם ב֌ַג֌וֹי֎ם ו֌לְז֞ךוֹת֞ם ב֌֞אֲך֞׊וֹת׃ כח וַי֌֎׊֌֞מְדו֌ לְבַעַל ׀֌ְעוֹך וַי֌ֹאכְלו֌ ז֎בְחֵי מֵת֎ים׃ כט וַי֌ַכְע֎יסו֌ ב֌ְמַעַלְלֵיהֶם וַת֌֎׀ְךׇץ֟ב֌֞ם מַג֌ֵ׀֞ה׃ ל וַי֌ַעֲמֹד ׀֌֎ינְח֞ס וַיְ׀ַל֌ֵל וַת֌ֵע֞׊ַך הַמ֌ַג֌ֵ׀֞ה׃ לא וַת֌ֵח֞שֶׁב לוֹ ל֮שְד־ק־ה לְדֹך ו֞דֹך עַד֟עוֹל֞ם׃ לב וַי֌ַקְ׊֎י׀ו֌ עַל֟מֵי מְ׹֮יב־ה וַי֌ֵךַע לְמֹשֶׁה ב֌ַעֲבו֌ך֞ם׃ לג כ֌֎י֟ה֎מְךו֌ אֶת֟ךו֌חוֹ וַיְבַט֌ֵא ב֌֎שְׂ׀֞ת֞יו׃ לד לֹא֟ה֎שְׁמ֎ידו֌ אֶת֟ה֞עַמ֌֎ים אֲשֶׁך א֞מַך יְהֹו֞ה ל֞הֶם׃ לה וַי֌֎תְע֞ךְבו֌ בַג֌וֹי֎ם וַי֌֎לְמְדו֌ מַעֲשֵׂיהֶם׃ לו וַי֌ַעַבְדו֌ אֶת֟עֲ׊ַב֌ֵיהֶם וַי֌֎הְיו֌ ל֞הֶם לְמוֹקֵשׁ׃ לז וַי֌֎זְב֌ְחו֌ אֶת֟ב֌ְנֵיהֶם וְאֶת֟ב֌ְנוֹתֵיהֶם לַשׁ֌ֵד֎ים׃ לח וַי֌֎שְׁ׀֌ְכו֌ ד־ם נ־ק֮י ד֌ַם֟ב֌ְנֵיהֶם ו֌בְנוֹתֵיהֶם אֲשֶׁך ז֎ב֌ְחו֌ לַעֲ׊ַב֌ֵי כְנ֞עַן וַת֌ֶחֱנַף ה֞א֞ךֶץ ב֌ַד֌֞מ֎ים׃ לט וַי֌֎טְמְאו֌ בְמַעֲשֵׂיהֶם וַי֌֎זְנו֌ ב֌ְמַעַלְלֵיהֶם׃ מ וַי֌֎חַך֟אַף יְהֹו֞ה ב֌ְעַמ֌וֹ וַיְת֞עֵב אֶת֟נַחֲל֞תוֹ׃ מא וַי֌֎ת֌ְנֵם ב֌ְיַד֟ג֌וֹי֎ם וַי֌֎מְשְׁלו֌ ב֞הֶם שֹׂנְאֵיהֶם׃ מב וַי֌֎לְח֞׊ו֌ם אוֹיְבֵיהֶם וַי֌֎כ֌֞נְעו֌ ת֌ַחַת י־ד־ם׃ מג ׀֌ְע֞מ֎ים ךַב֌וֹת יַ׊֌֎ילֵם וְהֵמ֌֞ה יַמְךו֌ בַעֲ׊֞ת֞ם וַי֌֞מֹכ֌ו֌ ב֌ַעֲוֺנ֞ם׃ מד וַי֌ַךְא ב֌ַ׊֌ַך ל֞הֶם ב֌ְשׇׁמְעוֹ אֶת֟ך֎נ֌֞ת֞ם׃ מה וַי֌֎זְכ֌ֹך ל֞הֶם ב֌ְך֎יתוֹ וַי֌֎נ֌֞חֵם כ֌ְךֹב חֲס֞ד֞ו׃ מו וַי֌֎ת֌ֵן אוֹת֞ם לְךַחֲמ֎ים ל֎׀ְנֵי כ֌ׇל֟שׁוֹבֵיהֶם׃ מז הוֹשׁ֎יעֵנו֌ יְהֹו֞ה אֱלֹהֵינו֌ וְקַב֌ְ׊ֵנו֌ מ֎ן֟הַג֌וֹי֎ם לְהֹדוֹת לְשֵׁם קׇדְשֶׁך֞ לְה֎שְׁת֌ַב֌ֵחַ ב֌֎תְה֎ל֌֞תֶך֞׃ מח ב֌֞ךו֌ךְ֟יְהֹו֞ה אֱלֹהֵי י֎שְׂך֞אֵל מ֎ן֟ה֞עוֹל֞ם וְעַד ה֞עוֹל֞ם וְא֞מַך כ֌ׇל֟ה֞ע֞ם א֞מֵן הַלְלו֌֟י֞ה֌׃